’تمام مذاہب میں قدامت پسندوں کا چھوٹا طبقہ ہے‘

Image captionپوپ فرانسس نے اس سے قبل بھی اسلام کو دہشت گردی سے جوڑنے کی مخالفت کی تھی

کیتھولک مسیحی برادری کے عالمی روحانی پیشوا پوپ فرانسس نے پولینڈ سے روم واپسی کے دوران طیارے میں کہا کہ اسلام کو دہشت گردی سے نہیں جوڑا جا سکتا۔

پوپ فرانسس نے کہا کہ کیتھولک عقیدے کے پیروکار بھی اتنے ہی خطرناک ہو سکتے ہیں۔

٭ پوپ 12 تارکین وطن کو اپنے ساتھ ویٹیکن لےگئے

٭ جب پوپ نے مسلمان پناہ گزینوں کے پاؤں چومے

انھوں نے متنبہ کیا کہ یورپ میں جاری سماجی ناانصافیاں نوجوانوں کو اسلحہ اٹھانے اور شدت پسندی کی راہ پر ڈال رہی ہیں۔

پوپ نے کہا: ’اسلام کو دہشت گردی سے جوڑنا درست نہیں، یہ صحیح نہیں۔‘

انھوں نے یورپ میں ہونے والے حالیہ حملوں کے سلسلے میں فرانس میں ایک کیتھولک پادری کے بہیمانہ قتل پر اسلام کی تنقید نہ کرنے کے اپنے فیصلے کا دفاع کیا۔

Image captionپوپ نے مختلف مذاہب کے پناہ گزینوں کے پاؤں چومے

نام نہاد جنگجو تنظیم دولت اسلامیہ نے اس قتل کی ذمہ داری قبول کی تھی۔

پوپ نے کہا: ’تقریبا تمام مذاہب میں قدامت پسندوں کا ایک چھوٹا طبقہ رہا ہے۔ ہمارے یہاں بھی ہے۔‘

انھوں نے کہا کہ ’دہشت گردی وہاں پیدا ہوتی ہے جہاں پیسے کے خدا کو اولیت دی جاتی ہے اور جہاں دوسرے متبادل نہیں ہوتے ہیں۔‘

انھوں نے سوال کیا: ’ہم نے اپنے کتنے یورپی نوجوانوں کو خالی از مقاصد اور بغیر کام کے چھوڑ رکھا ہے جو کہ منشیات، شراب نوشی اور شدت پسند گروہ کی جانب مائل ہوئے ہیں؟‘